Dominus Iesus, postquam cenavit

Спів на омивання ніг, РМ с. 246

Dominus Iesus, postquam cenavit cum discipulis suis, lavit pedes eorum, et ait illis:
«Scitis, quid fecerim vobis, ego Dominus et magister?
Exemplum dedi vobis, ut et vos ita faciatis.

Psalm 22
1. Dominus regit me, et nihil mihi deerit:
in loco pascuae, ibi me collocavit.

2. Super aquam refectionis educavit me;
animam meam convertit.

3. Deduxit me super semitas justitiae
propter nomen suum.

4 Nam etsi ambulavero in medio umbrae mortis, non timebo mala,
quoniam tu mecum es.

5. Virga tua, et baculus tuus,
ipsa me consolata sunt.

6. Parasti in conspectu meo mensam
adversus eos qui tribulant me;

7. impinguasti in oleo caput meum:
et calix meus inebrians, quam praeclarus est!

8. Et misericordia tua subsequetur me
omnibus diebus vitae meae;

9. et ut inhabitem in domo Domini
in longitudinem dierum.

Psalm 71
1. Deus, judicium tuum regi da,
et justitiam tuam filio regis;

2. judicare populum tuum in justitia,
et pauperes tuos in judicio.

3. Suscipiant montes pacem populo,
et colles justitiam.

4. Judicabit pauperes populi, et salvos faciet filios pauperum,
et humiliabit calumniatorem.

5. Et permanebit cum sole, et ante lunam,
in generatione et generationem.

6. Descendet sicut pluvia in vellus,
et sicut stillicidia stillantia super terram.

7. Orietur in diebus ejus justitia, et abundantia pacis,
donec auferatur luna.

8. Et dominabitur a mari usque ad mare,
et a flumine usque ad terminos orbis terrarum.

9. Coram illo procident Aethiopes,
et inimici ejus terram lingent.

10. Reges Tharsis et insulae munera offerent;
reges Arabum et Saba dona adducent:

11. et adorabunt eum omnes reges terrae;
omnes gentes servient ei.

12. Quia liberabit pauperem a potente,
et pauperem cui non erat adjutor.

13. Parcet pauperi et inopi,
et animas pauperum salvas faciet.

14. Ex usuris et iniquitate redimet animas eorum,
et honorabile nomen eorum coram illo.

15. Et vivet, et dabitur ei de auro Arabiae; +
et adorabunt de ipso semper,
tota die benedicent ei.

16. Et erit firmamentum in terra in summis montium;
superextolletur super Libanum fructus ejus, +
et florebunt de civitate sicut foenum terrae.

17 Sit nomen ejus benedictum in saecula;
ante solem permanet nomen ejus.

18. Et benedicentur in ipso omnes tribus terrae;
omnes gentes magnificabunt eum.

19. Benedictus Dominus Deus Israel,
qui facit mirabilia solus.

20. Et benedictum nomen majestatis ejus in aeternum, +
et replebitur majestate ejus omnis terra.
Fiat, fiat.